ත්‍රිපිටක පොත් වහන්සේ/සූත්‍ර පිටකය/ධම්ම පදය/යමක වග්ගය
01.කුශලාකුශල ධර්මයෝ සිත පෙරටු කොට ඇත්තෝ ය, සිත ප්‍රධාන කොට ඇත්තෝ ය. සිතින් ම උපන්නාහු ය. ඉදින් යමෙක් දූෂ්‍ය වූ සිතින් ක්‍රියා කෙරේ නම්, නපුරු වචන කියා නම් ඒ කරණකොට දුක ඔහු පසු පස්සේ ගමන් කරයි. (කුමක් මෙන් ද?) කරත්තේ බැඳී ගොනා ගේ පය අනුව යන රෝදය මෙනි.
02.කුශලාකුශල ධමයෝ සිත පෙරටු කොට ඇත්තා හ, සිත ප්‍රධානකොට ඇත්තාහ සිතින් ම උපන්නාහු ය. ඉදින් යමෙක් යහපත් සිතින් ක්‍රියා කෙරේ නම් යහපත් වචන කියා නම් ඒ කරණකොට සැපය ඔහු අනුව ය යි (කුමක් මෙන් ද?) තමා ගේ සෙවනැල්ල තමා අත්නොහැර පසු පස්සේ ගමන් කරන්නාක් මෙනි.
03.මට අපහාස කළේ ය, මට හිංසා කළේ ය, මා පැරදවූයේ ය, මාගේ දෙය පැහැර ගත්තේය යි යම් කෙනෙක් වෛර බඳීත් ද, ඔවුන් ගේ වෛරය නො සංසිඳේ.
04.මට අපහාස කළේ ය, මට හිංසා කළේ ය, මා පැරදවූයේ ය, මාගේ දෙය පැහැර ගත්තේය යි සිතා යම් කෙනෙක් වෛරය නො බඳීත් ද, ඔවුන් ගේ වෛරය සංසිඳේ.
05.මේ ලෝකයේ කිසි කලෙකත් වෛර කිරීමෙන් වෛරයෝ නො සන්සිදෙත්. වෛර නො කිරීමෙන් වෛරයෝ සන්සිදෙත්. මෙය පෙර සිට පැවතෙන ධර්මයකි, නැතහොත් සැමදා පවත්නා ස්වභාවයකි.
06.ඇතැම් කෙනෙක් මෙ හි දී අපි මැරෙමු යි හෝ විනාශය ට පත් වෙමු යි නො දනිත්, යම් කෙනෙක් ඒ කාරණය දනිත් නම් ඒ කරණකොට කලහයෝ (කෝලහලයෝ) සංසිදෙත්.
07.යමෙක් තමා දක්නා රූපාදිය ප්‍රියමනාප වශයෙන් සලකමින් වාසය කෙරේ ද, ඇස් කන් නාසාදි ඉන්ද්‍රියයන් ට කැමති සේ හැසිරෙන්ට ඉඩදේ ද, ආහාරයෙ හි පමණ නො දනී ද, කම්මැලි වේ ද, අඩු වීර්ය ඇත්තේ ද, ඒ පුද්ගලයා, වාතය දුර්වල ගසක් බිම හෙලන්නා සේ, කෙලෙස් මරුවා විසින් බිම හෙළනු ලැබේ.
08.යමෙක් තමා දක්නා රූපාදිය ප්‍රියමනාප වශයෙන් නො ගෙන වාසය කරයි ද, ඇස් කන් නාසාදි ඉන්ද්‍රියයන් ට කැමති සේ හැසිරෙන් ට නො දී හික්මවයි ද, ආහාරයෙ හි ප්‍රමාණය දන්නේද, ශ්‍රද්ධා ඇත්තේ ද, වැඩූ වීර්ය ඇත්තේ ද, ඒ පුද්ගලයා, වාතය ගල් පර්වතයක් සොලවන්ට අසමර්ථ වන්නා සේ, මාරයා විසින් නො මඩිනු ලැබේ.
09.කෙලෙස් කසට සහිත වූ, ඉන්ද්‍රිය දමනයෙන් හා ඇත්ත කීමෙන් ඉවත් වූ, යමෙක් කසාවත් හඳීන්නේ ද, හෙතෙම ඒ කසාවත දැරීමට සුදුස්සෙක් නො වේ.
10.යමෙක් දුරු කළ කෙලෙස් කසට ඇත්තේ ද, ශීලයෙ හි මනාසේ පිහිටියේ ද, ඉන්ද්‍රිය දමනයෙන් හා ඇත්ත කීමෙන් යුක්ත වූයේ ද, ඒ පුද්ගලයා කසාවත් දැරීම ට යෝග්‍ය වේ.