C හා C++ සිංහලෙන්/C සඳහා පළමු උදාහරණය

Wikibooks වෙතින්
Jump to navigation Jump to search

අපි C program එකක් නිර්මාණය කරන්න කලින් තේරුම් ගත යුතු කාරණා කිහිපයක් තියෙනවා. එකක් තමයි C කියන්නෙ Case-Sensitive පරිගණක භාෂාවක්. ඒ කියන්නේ UPPERCASE, lowercase වීම මත වචනයක් තවත් වචනයකින් වෙනස් වෙනවා. උදාහරණයක් විදිහට Lang, lang, lAnG කියන වචන තුනම එකිනෙකට වෙනස් වචන විදිහටයි C compiler එක සලකන්නේ. ඒ නිසා gcc program එකකදි අපට හරියටම නිවැරදි අකුරු ටයිප් කරන්න සිද්ද වෙනවා. දෙවැන්න gcc program එක ටයිප් කරන්න ඕනෑම Text Editor එකක් පාවිච්චි කරන්න පුළුවන්. තුන්වැන්න ඒක ටයිප් කිරීම අහවර කරලා එය කොහේ හෝ ගබඩා කර ඉන්පසු එය Compile කරන්න වෙනවා. ඊටත් පස්සෙයි අපට එය Run කර ප්‍රතිඵලය බලා ගත හැක්කේ.

පළමු පියවර[සංස්කරණය]

gcc program එකක් එක්කෝ void main() ලෙස ආරම්භ කර එක ලියා මුලින් විවෘත කළ සඟළ වරහන වසා දමා එක නිම කළ හැකියි. එසේත් නැතිනම් int main() ලෙස ආරම්භ කර අවසාන නියෝගය ලෙස return 0; යන්න ලියා සඟළ වරහන වසා එය නිම කළ හැකියි.

පළමු ක්‍රමය Turbo C++ හිදී වරදක් නොවේ. Ubuntu උඩ ඇති gcc වලදී warning එකක් දෙයි. අපට ඉදිරියට යා හැක. එහෙත්, Windows මත ඇති MinGW මඟින් install කළ gcc වලදී මෙය නිවැරදි යැයි භාර ගන්නේ නැත. එබැවින් අප දෙවන ක්‍රමයට යමු.

මෙහිදී දැන ගත යුතු තවත් කාරණයක් නම්, සෑම නියෝගයක් අවසානයේ දීම තිත් කොමාවකින් (";" යන්නෙන් ) එය අවසන් කළ යුතු බවයි. void main(){ යන්න හෝ int main(){ යන්න gcc program එකේ ආරම්භය මිස පූර්ණ නියෝගයක් නොවන බැවින් එය අවසානයේ තිත් කොමාව නොයෙදුවත්, return 0 යන්න අවසානයේ තිත් කොමාව යෙදීම අත්‍යවශ්‍යය.

පළමු පියවර අවසානයේදී අපගේ C Program එක

int main()
{
    return 0;
}


දෙවන පියවර[සංස්කරණය]

ඊළඟට මෙහි අන්තර්ගතය ලිවිය යුතුය. අප හිතමු අපට අවශ්‍ය වන්නේ "Hello World" යන්න තිරයේ දැක්වීමය කියා. පළමුව මෙය වචනයක් බැවින් උද්ධෘත පාඨ (Double Quotations) ඇතුළත එය ලිවිය යුතුය. මේ සඳහා වඩාත් ම පොදු නියෝගය වන printf යන්න භාවිතා කළ හොත් එය printf("Hello World"); සේ ලිවිය යුතුය. තිත් කොමාවකින් එය අවසන් කළ යුතුය. දැන් අපගේ C ක්‍රමලේඛණය පහත ආකාරයේ වේ.


 int main() {

 printf("Hello World");

 return 0; }


නියෝග තුළ යම් වචන හෝ අගයයන් ලියන විට ඒවා වරහන් තුළ ලියන අතර ඒවාට පරාමිතීන් (Parameters) යැයි කියනු ලැබේ.

තුන්වන පියවර[සංස්කරණය]

C Program එක ලියා (හෝ ටයිප් කර ) අවසාන නැත. C වල ඕනෑම නියෝගයක් ඇත්තේ යම් Header File එකක් (හෙවත් ලාච්චුවක්) තුළ ය. එම නියෝහය පාවිච්චි කිරීම සඳහා අදාල Header File එක හෙවත් ලාච්චුව ඇරිය යුතුය. මෙහිදී printf යන නියෝගය ඇත්තේ stdio.h යන Header File එක තුළ වන අතර එය විවෘත කරන නියෝගය #include යන්න වේ. එය ලියන්නේ program එකේ සියළු පේලිවලට ඉහළින් පහත දැක්වෙන ආකාරයටයි.

 #include< stdio.h >

  int main() {

   printf("Hello World");

   return 0; }


මතක තබා ගත යුතු වැදගත්ම දේ නම්, Header File එක ලියනු ලබන්නේ වරහන් තුළ නොව අසමානතා ලකුණු අතර බව ය.

සිව්වන පියවර[සංස්කරණය]

දැන් අපගේ C Program එක හමාර ය. දැන් ඇත්තේ එය ටයිප් කිරීම යි. Turbo C++ වලදී නම් විවෘත කළ ගමන් ලැබෙන්නේ Editor එක නිසා කෙලින්ම එය ටයිප් කළ හැක. Ubuntu උඩ ඇති gcc වලදී Ubuntu වල ඇති යම් වදන් සැකසුමක් (Text Editor) එකක් විවෘත කර මෙය ටයිප් කළ යුතුය. Windows උඩ දී නම් Notepad වැනි වදන් සකසුවක් (Text Editor)එකක් වුව ද භාවිතා කළ හැකිය.

ටයිප් කර අවසානයේ තමාට අවශ්‍ය තැනක (අපි ඒ තැන Examples නම් Folder එක යැයි සිතමු.) ඒ C program එක ගබඩා කළ හැකිය. මෙහිදී program එකෙහි දිගුව (extension) එක ලෙස .c යෙදිය යුතුය. එසේ නම් මෙම program එක අප ගබඩා කළේ Test1.c ලෙස යැයි සිතමු.

පස්වන පියවර[සංස්කරණය]

දැන් ඇත්තේ මෙය Compile කිරීමයි. Turbo C++ වලදී Menu එකෙහි ඇති Compile - Compile යන නියෝගය මඟින් එය සිදු කළ හැකිය. Ubuntu උඩ දී System යන්න විවෘත කළ යුතු අතර Windows වලදී cmd යන්න විවෘත කළ යුතුය. ඉන්පසු පහත අයුරින් program එක Folderr ඇති එකට ගොස් මෙය Compile කළ යුතුය.

cd Examples gcc Test1.c -o Answer

මේ එක් එක් නියෝගයක් අවසානයේ Enter එබිය යුතු වේ අවසාන නියෝගයේ gcc හා -o යන්න එසේම විය යුතුය. Test1.c යනු අප ගබඩා කළ C program එකයි. Answer යනු Compile කළ විට අපට ලැබිය යුතු ප්‍රතිඵලයයි.


සයවන පියවර[සංස්කරණය]

Turbo C++ වලදී Menu එකෙහි ඇති Run - Run යන නියෝගය මඟින් එය Run කළ යුතුය. ප්‍රතිඵලය බලා ගැනීමට File - DOS Shell මඟින් Command Window එකට යා යුතුය. Ubuntu වල gcc වලදී System හි ./Answer යන්න ටයිප් කර Enter කිරීමෙන් ප්‍රතිඵලය බලා ගත හැකි අතර Windows වලදී cmd හි නිකම්ම Answer යන්න ටයිප් කර Enter කිරීමෙන් එය කළ හැකිය.


මේ ඔබගේ පළමු C Program එකයි.



C වලින් යමක් තිරයේ දැක්වීම · පළමු උදාහරණයේ සැඟවුණු කරුණු